Microsoft ја претстави надградбата на Surface Laptop Go, која ќе биде достапна во текот на оваа година. Уредот е веќе во претпродажба, а официјалната продажба започнува на 7-ми јуни.

Surface Laptop Go 2 припаѓа на категоријата “entry level”. Оваа нова верзија не се разликува многу од претходникот, освен што доаѓа во уште една боја. Сега има вкупно 4 достапни бои: “Sage”, “Sandstone”, “Ice Blue” и “Platinum”. За жал, овој модел има резолуција која веќе е застарена. 12,4-инчниот PixelSense екран има резолуција од 1536х1024.

Процесорот Core i5-1135G7 од Intel е вграден заедно со интегрираната графичка картичка Iris Xe. Лаптопот има опција за 4 или 8 GB LPDDR4x RAM, со максимални 16 GB во подобрата конфигурација. За складирање се користи диск со капацитет од 128 GB или 256 GB SSD. Go 2 има вграден читач на отпечатоци во копчето за вклучување, но тоа е достапно само на моделите со 8 и 16 GB RAM. Основниот модел со 4 GB RAM не го нуди овој читач.

Камерата е 720p (f2.0), а уредот поддржува Wi-Fi 6 802.11ax и Bluetooth 5.1. Односно на портите, има USB Type-C, USB Type-A, 3.5mm приклучок за слушалки и Surface Connect.

Основниот модел на Surface Laptop Go 2 ќе биде достапен по цена од 600 долари. Ова е и првиот лаптоп од оваа линија кој доаѓа со оперативниот систем Windows 11, но има опција и за Windows 10 на деловните верзии.

Овој нов модел е дизајниран да биде полесен за сервисирање. Освен дискот, кој досега беше заменлив, сега може да се заменат повеќе делови. Батеријата, тастатурата, дисплејот и аудио кабелот  се дел од компонентите кои може да се заменат. Сепак, за замена на батеријата, уредот мора да се испрати на сервисниот центар на Microsoft.

Surface Laptop Go 2 треба да е конкуренција на Chromebook уредите. Овој лаптоп со новиот Intel Core i5 од 11-та генерација и оперативниот систем Windows 11 претставува одлична надградба за оваа година. Но, ако ви треба лаптоп за повеќе од прелистување на интернет или работа во Microsoft Office, моделот со 4GB RAM може да не ви е недоволен. Варијантата со 8GB RAM има цена од 700 долари, додека моделот со 8 GB RAM и 256 GB SSD изнесува 800 долари.